ភ្នំពេញ៖ ក្រសួងការបរទេសឱ្យដឹងថា ប្រទេសជប៉ុននឹងផ្ដល់កម្ចីដែលមានទឹកប្រាក់ចំនួន ៤១ពាន់ ៣៨៨លានយ៉េន ដែលស្មើនឹងជាង ៣០០លានដុល្លារសម្រាប់អនុវត្តគម្រោងអភិវឌ្ឍន៍ ចំណតផែកុងតឺន័រថ្មីនៅកំពង់ផែក្រុងព្រះសីហនុជំហានទី១។

បើតាមក្រសួងការបរទេសកម្ពុជា និងជប៉ុននឹងចុះហត្ថលេខាលើពិធីប្ដូរសារនៅថ្ងៃទី៦ ខែសីហា ឆ្នាំ២០២២ នៅវិមានសន្ដិភាពរវាងរដ្ឋមន្ត្រីក្រសួងការបរទេស លោក ប្រាក់ សុខុន និងរដ្ឋមន្ត្រីកាបរទេសជប៉ុន លោក ហាយ៉ាហ្ស៊ី យ៉ូហ្ស៊ីម៉ាសា (HAYASHI Yoshimasa)។

បើតាមក្រសួងការបរទេស ឥណទានសម្បទាននេះ នឹងរួមចំណែកយ៉ាងសំខាន់ដល់ការពង្រីក និងធ្វើទំនើបកម្មកំពង់ផែស្វយ័តក្រុងព្រះសីហនុ និងដើម្បីប្រែក្លាយកំពង់ផែនេះទៅជាកំពង់ផែទឹកជ្រៅស្នូលសម្រាប់ប្រទេសកម្ពុជា និងក្នុងតំបន់ ស្របតាមការប្តេជ្ញាចិត្តរបស់នាយករដ្ឋមន្ត្រីនៃប្រទេសទាំងពីរកាលពីដើមឆ្នាំនេះ។ នៅមុនពិធីចុះហត្ថលេខា ឯកឧត្តម ហាយ៉ាហ្ស៊ី យ៉ូហ្ស៊ីម៉ាសា នឹងអញ្ជើញចូលជួបសម្ដែងការ គួរសមចំពោះសម្តេចតេជោនាយករដ្ឋមន្ត្រី ហ៊ុន សែន៕